‘ಐಐಟಿ ರೂರ್ಕಿ’ ಜೊತೆ ಮಹತ್ವದ ಒಪ್ಪಂದಕ್ಕೆ ಸಹಿ ಹಾಕಿದ ‘ಆರ್ಸೆಲರ್ ಮಿತ್ತಲ್ ನಿಪ್ಪಾನ್ ಸ್ಟೀಲ್’, ಏನಿದರ ಉದ್ದೇಶ?
ಬೆಂಗಳೂರು: ಭಾರತದ ಉತ್ಪಾದನೆ ಮತ್ತು ಉಕ್ಕಿನ ತಂತ್ರಜ್ಞಾನವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯುವ ನಿಟ್ಟಿನಲ್ಲಿ ದೇಶದ ಎರಡು ಪ್ರಖ್ಯಾತ ಸಂಸ್ಥೆಗಳು ಮಹತ್ವದ ಹೆಜ್ಜೆ ಇಟ್ಟಿವೆ. ಶಿಕ್ಷಣ, ಸಂಶೋಧನೆ ಮತ್ತು ನಾವೀನ್ಯತೆಯನ್ನು ಅಭಿವೃದ್ಧಿಪಡಿಸಲು ಪ್ರಸಿದ್ಧ ಉಕ್ಕು ಉತ್ಪಾದಕ ಕಂಪನಿ ‘ಆರ್ಸೆಲರ್ ಮಿತ್ತಲ್ ನಿಪ್ಪಾನ್ ಸ್ಟೀಲ್ ಇಂಡಿಯಾ’ ಮತ್ತು ದೇಶದ ಪ್ರತಿಷ್ಠಿತ ಶಿಕ್ಷಣ ಸಂಸ್ಥೆ ‘ಐಐಟಿ ರೂರ್ಕಿ’ ಜಂಟಿ ಒಪ್ಪಂದಕ್ಕೆ ಸಹಿ ಹಾಕಿವೆ.
ಕೈಗಾರಿಕಾ ವಲಯದ ಬೃಹತ್ ಅನುಭವವನ್ನು ಹೊಂದಿರುವ ಆರ್ಸೆಲರ್ ಮಿತ್ತಲ್ ನಿಪ್ಪಾನ್ ಸ್ಟೀಲ್ ಮತ್ತು ಶೈಕ್ಷಣಿಕ ಸಂಶೋಧನೆಯಲ್ಲಿ ಮುಂಚೂಣಿಯಲ್ಲಿರುವ ಐಐಟಿ ರೂರ್ಕಿ ಜೊತೆಯಾಗಿರುವುದರಿಂದ, ಭಾರತದ ಕೈಗಾರಿಕಾ ಬೆಳವಣಿಗೆಗೆ ಭಾರಿ ಉತ್ತೇಜನ ಸಿಗಲಿದೆ.
ಈ ಒಪ್ಪಂದದ ಉದ್ದೇಶಗಳೇನು?
ಈ ಪಾಲುದಾರಿಕೆಯ ಅಡಿಯಲ್ಲಿ ಎರಡೂ ಸಂಸ್ಥೆಗಳು ಹಲವು ಪ್ರಮುಖ ಕ್ಷೇತ್ರಗಳಲ್ಲಿ ಒಟ್ಟಾಗಿ ಕೆಲಸ ಮಾಡಲಿವೆ. ವಿದ್ಯಾರ್ಥಿಗಳು ಮತ್ತು ಉದ್ಯೋಗಿಗಳಿಗೆ ಜಂಟಿಯಾಗಿ ಶೈಕ್ಷಣಿಕ ಕಾರ್ಯಕ್ರಮಗಳು, ವೃತ್ತಿಪರ ತರಬೇತಿ ಕೋರ್ಸ್ಗಳು ಹಾಗೂ ಕೌಶಲ್ಯ ಅಭಿವೃದ್ಧಿ ಕಾರ್ಯಕ್ರಮಗಳನ್ನು ನೀಡಲಿವೆ.
ಅಲ್ಲದೆ, ಕೈಗಾರಿಕೆಗಳಿಗೆ ಅಗತ್ಯವಿರುವ ತಾಂತ್ರಿಕ ಸಲಹೆಗಳನ್ನು ನೀಡುವುದು, ಸಮಸ್ಯೆಗಳನ್ನು ಬಗೆಹರಿಸುವುದು ಮತ್ತು ತಂತ್ರಜ್ಞಾನದ ಮೌಲ್ಯಮಾಪನ ಮಾಡುವುದು ಈ ಒಪ್ಪಂದದ ಪ್ರಮುಖ ಅಂಶವಾಗಿದೆ.
ಹೊಸ ತಂತ್ರಜ್ಞಾನಗಳ ಅಭಿವೃದ್ಧಿ, ಜಂಟಿ ಸಂಶೋಧನೆ, ಪೇಟೆಂಟ್ಗಳ ಸೃಷ್ಟಿ ಮತ್ತು ಪ್ರಕಟಣೆಗಳ ಮೇಲೆ ಎರಡೂ ಸಂಸ್ಥೆಗಳು ಗಮನ ಹರಿಸಲಿವೆ.
ಒಪ್ಪಂದದಲ್ಲಿ ‘ನ್ಯಾಮ್ಟೆಕ್’ ಪಾತ್ರವೇನು?
ಈ ಒಪ್ಪಂದವನ್ನು ಕಾರ್ಯಗತಗೊಳಿಸಲು ಆರ್ಸೆಲರ್ ಮಿತ್ತಲ್ ನಿಪ್ಪಾನ್ ಸ್ಟೀಲ್ ತನ್ನ ಶೈಕ್ಷಣಿಕ ವೇದಿಕೆಯಾದ ‘ನ್ಯಾಮ್ಟೆಕ್’ ಅನ್ನು ಬಳಸಿಕೊಳ್ಳಲಿದೆ. ಇದು ಕೈಗಾರಿಕೆ ಮತ್ತು ಶಿಕ್ಷಣ ಸಂಸ್ಥೆಗಳ ನಡುವಿನ ಅಂತರವನ್ನು ಕಡಿಮೆ ಮಾಡಲು ಸ್ಥಾಪಿಸಲಾದ ವೇದಿಕೆಯಾಗಿದೆ.
ವಿದ್ಯಾರ್ಥಿಗಳಿಗೆ ಕೇವಲ ಪುಸ್ತಕದ ಜ್ಞಾನ ನೀಡದೆ, ಉದ್ಯಮಕ್ಕೆ ಅಗತ್ಯವಿರುವ ಪ್ರಾಯೋಗಿಕ ಅನುಭವವನ್ನು ನೀಡಿ, ಅವರನ್ನು ಭವಿಷ್ಯದ ಉದ್ಯೋಗಗಳಿಗೆ ಸಜ್ಜುಗೊಳಿಸಲು ನ್ಯಾಮ್ಟೆಕ್ ಸಹಾಯ ಮಾಡುತ್ತದೆ.
ಈ ಒಪ್ಪಂದದ ಕುರಿತು ಪ್ರತಿಕ್ರಿಯಿಸಿರುವ ಆರ್ಸೆಲರ್ ಮಿತ್ತಲ್ ನಿಪ್ಪಾನ್ ಸ್ಟೀಲ್ನ ಸಿಇಒ ದಿಲೀಪ್ ಉಮ್ಮನ್, “ಭಾರತದ ಕೈಗಾರಿಕಾ ಬದಲಾವಣೆಗೆ ಉದ್ಯಮ ಮತ್ತು ಶಿಕ್ಷಣ ಸಂಸ್ಥೆಗಳ ನಡುವೆ ಆಳವಾದ ಸಹಯೋಗದ ಅಗತ್ಯವಿದೆ. ಐಐಟಿ ರೂರ್ಕಿ ಮತ್ತು ನಮ್ಮ ನ್ಯಾಮ್ಟೆಕ್ ವೇದಿಕೆಯ ಮೂಲಕ ಭವಿಷ್ಯದ ಕೌಶಲ್ಯಪೂರ್ಣ ಪ್ರತಿಭೆಗಳನ್ನು ಬೆಳೆಸಲು ಹಾಗೂ ಭಾರತದ ಉಕ್ಕಿನ ವಲಯವನ್ನು ಜಾಗತಿಕ ಮಟ್ಟದಲ್ಲಿ ಸ್ಪರ್ಧಾತ್ಮಕವಾಗಿಸುವ ಗುರಿಯನ್ನು ನಾವು ಹೊಂದಿದ್ದೇವೆ,” ಎಂದರು.
ನ್ಯಾಮ್ಟೆಕ್ನ ಬೋರ್ಡ್ ಆಫ್ ಡೈರೆಕ್ಟರ್ಸ್ ಸದಸ್ಯ ಸಂಜಯ್ ಶರ್ಮಾ ಅವರು, “ಈ ಒಪ್ಪಂದವು ಪ್ರಾಯೋಗಿಕ ಕಲಿಕೆ ಮತ್ತು ಕೈಗಾರಿಕೆಗಳ ನೈಜ ಅಗತ್ಯಗಳಿಗೆ ಸ್ಪಂದಿಸುವ ಸಂಶೋಧನೆಗಳನ್ನು ಮಾಡಲು ಹೊಸ ದಾರಿಗಳನ್ನು ತೆರೆಯಲಿದೆ,” ಎಂದು ಅಭಿಪ್ರಾಯಪಟ್ಟರು.
ಐಐಟಿ ರೂರ್ಕಿಯ ನಿರ್ದೇಶಕ ಡಾ. ಕೆ.ಕೆ. ಪಂತ್ ಪ್ರತಿಕ್ರಿಯಿಸಿ, “ಶೈಕ್ಷಣಿಕ ಸಂಶೋಧನೆಯನ್ನು ಕೈಗಾರಿಕೆಗಳ ಬಳಕೆಗೆ ತರುವಲ್ಲಿ ಈ ಒಪ್ಪಂದ ಮಹತ್ವದ ಹೆಜ್ಜೆಯಾಗಿದೆ. ಐಐಟಿ ರೂರ್ಕಿಯ ಸಂಶೋಧನಾ ಶಕ್ತಿ ಮತ್ತು ಆರ್ಸೆಲರ್ ನಿಪ್ಪಾನ್ನ ಕೈಗಾರಿಕಾ ಅನುಭವವನ್ನು ಒಗ್ಗೂಡಿಸುವ ಮೂಲಕ, ‘ವಿಕಸಿತ್ ಭಾರತ್’ ಕನಸಿಗೆ ಪೂರಕವಾಗಿ ನಾವು ಸುಸ್ಥಿರ ಮತ್ತು ಪ್ರಾಯೋಗಿಕ ಪರಿಹಾರಗಳನ್ನು ನೀಡಲಿದ್ದೇವೆ,” ಎಂದು ವಿವರಿಸಿದರು.
ಇದೊಂದು ದೀರ್ಘಾವಧಿಯ ಒಪ್ಪಂದವಾಗಿದ್ದು, ಭವಿಷ್ಯದಲ್ಲಿ ಉದ್ಯಮ ಮತ್ತು ಶೈಕ್ಷಣಿಕ ವಲಯದ ನಡುವೆ ಬಲವಾದ ಬಾಂಧವ್ಯವನ್ನು ಸೃಷ್ಟಿಸಲಿದೆ. ಜೊತೆಗೆ ಭಾರತದ ಆರ್ಥಿಕ ಮತ್ತು ಕೈಗಾರಿಕಾ ಬೆಳವಣಿಗೆಗೆ ಭದ್ರ ಬುನಾದಿಯನ್ನೂ ಹಾಕಲಿದೆ.
