ಇನ್ಸ್ಟಾಮಾರ್ಟ್ ಡೆಲಿವರಿ ಪಾಲುದಾರರಿಗೆ ಇವಿ ಸೌಲಭ್ಯ ವಿಸ್ತರಣೆ; ಯುಲು, ಯುಮಾ ಎನರ್ಜಿ ಜೊತೆ ಪಾಲುದಾರಿಕೆ
ಬೆಂಗಳೂರು: ಲಾಸ್ಟ್ ಮೈಲ್ ಡೆಲಿವರಿಯಲ್ಲಿ ಎಲೆಕ್ಟ್ರಿಕ್ ವಾಹನ ಬಳಕೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಇನ್ಸ್ಟಾಮಾರ್ಟ್, ಯುಲು ಮತ್ತು ಯುಮಾ ಎನರ್ಜಿ ಜೊತೆಗೂಡಿ ಬ್ಯಾಟರಿ ಸ್ವಾಪಿಂಗ್ ಮೂಲಸೌಕರ್ಯ ಹಾಗೂ ಕೈಗೆಟುಕುವ ಇವಿ ಸೌಲಭ್ಯಗಳನ್ನು ವಿಸ್ತರಿಸಿದೆ.
ಯುಮಾ ಎನರ್ಜಿ ಜೊತೆಗಿನ ಪಾಲುದಾರಿಕೆಯಡಿ, ಇನ್ಸ್ಟಾಮಾರ್ಟ್ ತನ್ನ ಪಿಒಡಿ ಅಥವಾ ಡಾರ್ಕ್ ಸ್ಟೋರ್ಗಳಲ್ಲಿ ಬ್ಯಾಟರಿ ಸ್ವಾಪಿಂಗ್ ಸ್ಟೇಷನ್ಗಳಿಗೆ ಸ್ಥಳಾವಕಾಶ ಒದಗಿಸುತ್ತಿದೆ. ಈ ತಿಂಗಳ ಆರಂಭದಲ್ಲಿ ಮೊದಲ ಸ್ವಾಪಿಂಗ್ ಸ್ಟೇಷನ್ನ್ನು ಇನ್ಸ್ಟಾಮಾರ್ಟ್ ಪಿಒಡಿಯಲ್ಲಿ ಆರಂಭಿಸಲಾಗಿದೆ. ಯುಮಾ ಎನರ್ಜಿ ಈಗಾಗಲೇ 2,000ಕ್ಕೂ ಹೆಚ್ಚು ಬ್ಯಾಟರಿ ಸ್ವಾಪಿಂಗ್ ಘಟಕಗಳನ್ನು ನಿರ್ವಹಿಸುತ್ತಿದ್ದು, ಒಂದು ಬ್ಯಾಟರಿ ಬದಲಾವಣೆಗೆ ಎರಡು ನಿಮಿಷಕ್ಕಿಂತ ಕಡಿಮೆ ಸಮಯ ಬೇಕಾಗುತ್ತದೆ.
ಪ್ರತಿದಿನ ಸರಾಸರಿ 90 ಕಿ.ಮೀ. ಅಥವಾ ಅದಕ್ಕಿಂತ ಹೆಚ್ಚು ಸಂಚರಿಸುವ ಡೆಲಿವರಿ ಪಾಲುದಾರರಿಗೆ ದಿನಕ್ಕೆ ಎರಡು ಬಾರಿ ಬ್ಯಾಟರಿ ಬದಲಾವಣೆ ಅಗತ್ಯವಾಗಬಹುದು. ಪಿಒಡಿಗಳ ಸಮೀಪದಲ್ಲೇ ಸ್ವಾಪಿಂಗ್ ಸೌಲಭ್ಯ ಲಭ್ಯವಾಗುವುದರಿಂದ ದಿನಕ್ಕೆ 60 ನಿಮಿಷಗಳವರೆಗೆ ಪ್ರಯಾಣ ಮತ್ತು ಕಾಯುವ ಸಮಯ ಉಳಿಯಬಹುದು ಎಂದು ಕಂಪನಿ ತಿಳಿಸಿದೆ.
ಇನ್ಸ್ಟಾಮಾರ್ಟ್ನ ಡ್ರೈವರ್ ಮತ್ತು ಡೆಲಿವರಿ ವಿಭಾಗದ ಉಪಾಧ್ಯಕ್ಷ ಅನಂತ್ ಚೌಧರಿ, “ಇವಿ ಬಳಕೆಯನ್ನು ಸುಲಭಗೊಳಿಸಲು ವಾಹನ ಲಭ್ಯತೆ, ಕಡಿಮೆ ಕಾರ್ಯಾಚರಣಾ ವೆಚ್ಚ ಮತ್ತು ಚಾರ್ಜಿಂಗ್ನಿಂದ ಉಂಟಾಗುವ ಸಮಯ ನಷ್ಟವನ್ನು ಕಡಿಮೆ ಮಾಡುವುದು ಮುಖ್ಯ,” ಎಂದಿದ್ದಾರೆ.
ಯುಲು ಜೊತೆಗಿನ ಸಹಯೋಗದಡಿ, ಯುಲು ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳನ್ನು ಬಳಸುವ ಡೆಲಿವರಿ ಪಾಲುದಾರರಿಗೆ ಇನ್ಸ್ಟಾಮಾರ್ಟ್ ಬಾಡಿಗೆ ಕ್ಯಾಶ್ಬ್ಯಾಕ್ ಪ್ರೋತ್ಸಾಹ ನೀಡುತ್ತಿದೆ. ಮೇ 2026ರಿಂದ ಈ ಯೋಜನೆಯಡಿ ಸಾವಿರಾರು ಪಾಲುದಾರರಿಗೆ ನೆರವು ನೀಡಲಾಗಿದ್ದು, ಅವರ ಬಾಡಿಗೆ ವೆಚ್ಚದಲ್ಲಿ ಶೇ.30ರವರೆಗೆ ಕಡಿತವಾಗಿದೆ.
ಯುಮಾ ಎನರ್ಜಿ ಅಧಿಕಾರಿಗಳ ಪ್ರಕಾರ, ಕೈಗೆಟುಕುವ ವಾಹನದ ಜೊತೆಗೆ ನಿರಂತರ ಬ್ಯಾಟರಿ ಲಭ್ಯತೆಯೂ ಡೆಲಿವರಿ ರೈಡರ್ಗಳ ಆದಾಯ ಸಾಮರ್ಥ್ಯಕ್ಕೆ ಪ್ರಮುಖವಾಗಿದೆ.
ಇನ್ಸ್ಟಾಮಾರ್ಟ್ ಮತ್ತು ಸ್ವಿಗ್ಗಿ ಸೇರಿ ದೇಶಾದ್ಯಂತ 50ಕ್ಕೂ ಹೆಚ್ಚು ಇವಿ ಪಾಲುದಾರರೊಂದಿಗೆ ಕಾರ್ಯನಿರ್ವಹಿಸುತ್ತಿದ್ದು, ವಾಹನ ಲಭ್ಯತೆ, ಕೈಗೆಟುಕುವಿಕೆ ಹಾಗೂ ಅನುಕೂಲಕರ ಶಕ್ತಿ ಮೂಲಸೌಕರ್ಯವನ್ನು ಒಟ್ಟುಗೂಡಿಸಿ ಡೆಲಿವರಿ ಫ್ಲೀಟ್ನಲ್ಲಿ ಇವಿ ಬಳಕೆಯನ್ನು ಮತ್ತಷ್ಟು ಹೆಚ್ಚಿಸುವ ಗುರಿ ಹೊಂದಿವೆ.
